Gwyneth Paltrow fór í samstarf við fatamerkið ZOEtee's fyrr á árinu um hönnun á eigin línu fyrir haustið. Nú hefur afraksturinn verið opinberaður og má telja hann nokkuð góðan af stjörnufatalínu að vera. Línan, sem kallast ZOEtee‘s Loves Gwyneth er komin í verslanir og er áætlað að hún eigi eftir að seljast vel. Tískuheimur greindi frá því áður að búast mætti við buxnasamfestingum, bómullarleggings, peysum með vintage útliti og fallega dreiperuðum partýkjólum í línunni, en þær flíkur eru á sínum stað ásamt fleirum.

Þó að Gwyneth hafi mikið verið viðriðin hönnunarferlið fékk hún liðsstyrk frá hönnuði ZOEtee‘s, Michael Corty, en í sameiningu reyndu þau að gera línu sem endurspeglaði stíl Gwyneth sjálfrar. Samkvæmt Corty er það „frá afslöppuðum stíl hennar yfir daginn til fágaðs stíl hennar á kvöldin.“ Þau héldu sig við klassíska liti – svartan og gráan – enda sést Gwyneth ekki oft í skærum litum. Þægindin eru höfð í fyrirrúmi en línan ber þó yfir sér svolítið rokkaðan seventís glamúr á móti. Sem sagt, fullkominn fatnaður hversdags jafnt sem fínt.

Það leið ekki á löngu þar til eitt tískutímaritanna gerðu tískuþátt um Michael sáluga Jackson. Eins og flestir vita voru búningar hans goðsagnakenndir og stór partur af ímynd hans. Það er Harper‘s Bazaar sem fékk fyrirsætuna Agyness Deyn til að setja sig í spor Jackson og pósa í nokkrum af hans bestu lúkkum. Myndaserían, sem var mynduð af Terry Richardson, birtist í september blaði tímaritsins.

Nýjustu fréttir innan tískubloggheimsins er samvinna bloggarans Garance Doré við Gap. Fyrir þá sem ekki þekkja til Garance Doré, þá er hún franskur ljósmyndari og teiknari sem einbeitir sér að því að taka myndir af smart klæddu fólki á götum Parísar og víða. Garance er ein af þekktustu götustílsljósmyndurunum en sá þekktasti er án efa Scott Schuman, kærasti Garance. Nýjasta verkefni Garance er að sýna fallegar tískuteikningar sínar í tímabundinni verslun sem Gap mun opna í London.

Patrick Robinson, yfirhönnuður Gap, er á fullu við að hressa upp á klassíska ameríska merkið í tilefni af 40 ára afmælisári þess. Liður í þessari áætlun er að fá Garance til að sýna í versluninni í London en auk sýningarinnar munu einnig verða framleiddir bolir með áprentuðum teikningum eftir hana. Verslunin mun opna á Carnaby Street 10.september og verður aðeins opin í um 20 daga. Í henni verður hægt að nálgast gallabuxnalínu verslanakeðjunnar ásamt sérstökum hönnunarlínum í takmörkuðu upplagi.

Hver man ekki eftir bolaæðinu sem fylgdi litríkum bolum Henry Holland með grípandi tilvitnunum til fólks innan tískubransans? Chritsopher Bailey, hönnuður Burberry, og Giles Deacon voru báðir teknir fyrir á áprentuðum bolum Henry. Nú eru það hins vegar aðrir bolahönnuðir sem fá alla athygli tískuheimsins. Christopher Sauvé varð frægur fyrir boli sína með áletruninni „I DIE. BANANAS“ sem á rætur að rekja til stjörnustílistans Rachel Zoe sem notar orðin óspart yfir hluti sem hún heldur vart vatni yfir. Vinsældir bolsins náðu þó aldrei neinu flugi þar sem Sauvé fékk bréf frá lögfræðingum Zoe um að orðin væru skrásett vörumerki og hann gæti þar af leiðandi ekki selt bolina.

Sauvé brást við með því að búa til bol með skýrri tilvitnun í þann fyrri en með áletruninni „I LIVE. PINEAPPLES“ í staðinn. Hann hefur einnig snúið sér að gerð annars konar tískubola. Anna Wintour er sérstakt skotmark, en bolir með andliti hennar bera setningarnar „God Save The Queen“ og „Save Anna“. Nýjasti bolurinn er svo nokkuð trúarlegur, en á honum er að sjá mynd af Guð með áletruninni „God Don‘t Like Ugly“. Fyrirsætan Ida Pyk hefur einnig snúið sér að bolahönnun en hún einbeitir sér að lystarstoli. „i was anorexic“ prýðir einn bolinn en á bakhliðinni stendur „but i am okay now“. Auk þess bera sokkabuxur orðin „anorexic legs“.

Hægt er að skoða fleiri boli Sauvé á síðunni hans www.christopherleesauve.com.

Miuccia Prada; fyrirsætan Katie Fogarty í Prada sýningunni; fyrirsætan Yulia Kharlaponova.

September blöð tískutímaritanna eru stútfull af safaríkum viðtölum og myndaþáttum með heitustu talentum tískuheimsins í fararbroddi. Eitt þessara viðtala við Miuccia Prada í W Magazine. Þar talar hún um haustlínu sína, sem var innblásin af sjómönnum, og ýmislegt fleira. Það sem vakti almenna athygli er umtal hennar um tískusýningu síðustu sumarlínunnar. Sýningin átti sér stað síðasta haust en hún gekk ekki snurðulaust fyrir sig. Hælaskórnir sem Miuccia hafði hannað voru svo himinháir að fyrirsæturnar áttu afskaplega erfitt með gang. Tvær fyrirsætur voru meira að segja svo óheppnar að hreinlega detta í miðjum kattarganginum.

Prada hefur ekki tjáð sig um atvikið þangað til núna. Í viðtalinu kom í ljós að henni líkaði í raun við það að fyrirsæturnar voru við það að detta. „Það gerði sýninguna áhugaverðari,“ segir hún í samtali við W. Fyrirsætunum líkaði það hins vegar ekki. „Ég fékk kvíðakast, hendurnar á mér skulfu,“ sagði ein þeirra eftir sýninguna. Sumar grétu jafnvel baksviðs af því þær voru svo hræddar um að detta. Áhorfendur sýningarinnar gagnrýndu einnig háa skótauið og sögðu erfiðleikana með ganginn vera truflun frá fatnaðinum. Skórnir fengu þó allavega næga athygli en ekki er víst að margir hafi þorað að verða sér úti um Prada skópar úr sumarlínunni, nema þá til að horfa á uppi á hillu.

Hér fyrir neðan má sjá myndband af fyrirsætunni Katie Fogarty detta í Prada sýningunni, ásamt viðtölum við nokkra þekkta sýningargesti.

Blake Lively og Tory Burch í "gervi" skrifstofunni; Zac Posen í gestahlutverki sínu í The Beautiful Life.

Nýjasta æðið meðal hönnuða Bandaríkjanna er að hækka vinsældarstöðul sinn með því að koma fram í gestahlutverki sjónvarpsþátta. Þættirnir sem um ræðir eru annars vegar hinn geysivinsæli Gossip Girl, um líf unglinganna í efri stétt New York borgar, ásamt nýja þættinum The Beautiful Life, sem fjallar um líf fyrirsæta og dramatík þeirra á milli. Báðir þættirnir eiga sterk tengsl við tískuna, sá fyrri er eins og allir vita þekktur fyrir flott föt en sá seinni fjallar um tískuheiminn út frá skuggahliðum hans.

Nýjustu fréttirnar eru þær að Tory Burch og Georgina Chapman (hönnuður Marchesa) muni koma fram í væntanlegum þáttum Gossip Girl. Þær eru í sitt hvorri senunni í sama þáttinum sem sýndur verður í byrjun október. Ekki er vitað hvert hlutverk þeirra er, en þó hefur það verið afhjúpað að Tory Burch komi fram í setti útbúnu sem skrifstofa hennar. Fyrir utan þær Burch og Chapman hefur hönnuðurinn Michael Kors áður birst í Gossip Girl þætti sem fjallaði um tískuvikuna í New York.

Hvað hinn þáttinn varðar, The Beautiful Life, þá varð það frægt fyrir nokkru að Zac Posen tók að sér að leika í þættinum. Hann lék sjálfan sig í senu sem átti að gerast baksviðs á tískusýningunni hans. Nina Garcia, tískustjóri Marie Claire og metsöluhöfundur þriggja tískubóka, hefur einnig leikið í þættinum. Þar sem þátturinn er allur um tísku og fyrirsætur er búið að bóka fullt af fleira tískufólki í tökur. Þar á meðal eru hönnuðirnir Matthew Williamson og Erin Fetherston ásamt fyrirsætunni Jessicu Stam.

Fyrir haustið hafa Olsen systur, þær Ashley og Mary-Kate, opinberað skólínu í annað sinn innan merkis síns Elizabeth & James. Fyrri skólínan þótti heppnast nokkuð vel en sú seinni jafnvel betur. Línan er mjög fjölbreytt og inniheldur allt frá pinnahælum til grófra stígvéla – systurnar hafa hannað skó fyrir alla sína viðskiptavina, hver sem stíll þeirra gæti hugsanlega verið. Þær nota ólík efni á borð við leður, rúskinn, flauel og blúndu í svörtu, brúnu, gráu, fjólubláu og bláu. Skórnir eru enn ekki komnir í almenna sölu en hægt er panta þá á Saks.com.

Olsen systur voru nýlega viðurkenndar sem hönnuðir með því að fá inngöngu inn í félag amerískra fatahönnuða, CFDA. Ashley er svo í viðtali í september hefti Marie Claire þar sem hún talar um tísku og stíl þeirra systra. „Mary-Kate og ég vitum af trendum  og stílum, en þegar upp er staðið hugsum við ekki tvisvar um það,“ segir hún í samtali við tímaritið. „Ég held að annað hvort fæðistu með stíl eða ekki. Mary-Kate og ég hugsum ekki um tísku sem hreinan og fallegan hlut. Við eiginlega klæðumst henni og lifum í henni.“

Aðalsýningarstaðurinn í Bryant Park; Alexander Wang er einn af þeim sem sýna á nýja staðnum í Milk Studios.

Þegar kreppan skall á var aðalmálið í tískuheiminum – hvað verður um tískuvikurnar? Hönnuðir sáu eflaust margir fram á að þurfa að láta tískusýningar sínar víkja með öllu tilheyrandi og kostnaðinum sem þeim fylgja. Þó að allnokkrir hönnuðir hafi skipt tískusýningum sínum út fyrir lágstemmdari kynningu í stúdíóinu sínu í febrúar er áætlað að væntanleg tískuvika í New York muni ekki bíða mikinn skaða vegna kreppunnar. Mun meira verður um kynningar í stað tískusýninga en samt sem áður er búið að fylla öll pláss á aðalsýningarstaðnum.

Svo mikil er í raun ásóknin að búið er að mynda nýjan og ferskan sýningarstað af snyrtivörumerkinu MAC. Nokkur fjöldi töff tískumerkja og hönnuða hafa nú þegar skráð sig, en meðal þeirra eru Proenza Schouler, Erin Fetherston, Alexander Wang, ThreeAsFour, Band of Outsiders og Preen. Á meðan hvert sýningarsvæði í tjöldunum í Bryant Park kostar 25 þúsund dollara er sýningarsvæði M.A.C., sem er í Milk Studios, frítt. Skipuleggjendur tískuvikunnar í New York líta á nýja svæðið sem viðbót við það gamla góða og ætla að bjóða sýningargestum upp á rútur á milli staða.

Að þessu sögðu verður hins vegar öll athygli á London á komandi tískuvikumánuðum. Breska tískuráðið hefur keppst um að fá breska hönnuði sem sýnt hafa erlendis síðustu ár um að koma heim og hafa viðbrögðin ekki látið á sér standa. Von er á Burberry, Matthew Williamson, Pringle of Scotland og fleirum, en þeir nýjustu til að bætast í hópinn eru Antonio Berardi og þær áströlsku Sarah-Jane Clarke og Heidi Middleton á bakvið Sass & Bide. Tískuvikurnar ættu því að verða ómæld ánægja fyrir tískuáhugafólk rétt eins og áður.